Zetaz zeta

Zuloagaren (Eibar 1870, Madril 1945) margolaritza lana ezagutzea ikaragarria da. Imajinatu bere lanetan murgildu ahal izatea obraren parte egiten gaituzten eta sekula ez bezala bere margolanak ikustearen sentsazioa esperimentatzeko aukera ematen diguten pantaila digital erraldoien bidez. Horixe da La Terminaleko (Zorrotzaurre, Bilbo) erakusketa berrienak proposatzen duena. Jatorri euskalduneko margolariaren izena duen kalean zegoen estanpazio eta galdaragintzako fabrika zahar bat Kultura eta Sormen Industrien Fabrika (FICC) handia bihurtu zuten, eta espazio bera partekatzen duten askotariko diziplinen arteko trukatzeak eta elkarbizitza sustatzen dira bertan, eta horietara guztietara irekita dagoen lekua da. Espazio horietako bat arte galeria digital bihurtuko dute, eta teknologia aprobetxatuko dute arte erakusketa bat disfrutatzearen esperientzia ezberdina izan dadin.

Ez da erakusketa huts bat, UPV/EHUko Arte Ederren Fakultateko Sorkuntza eta Diseinuko Graduko ikaslea den Beñat Ibarra Abalek (Bilbo, 1998) gradu amaierako lan gisa egindako ikus-entzunezko sorkuntza bat da. Lan hori berrikusi du Oihane Iraguen Zabala (Bilbo, 1985) irakasleak. UPV/EHUn Ikus-entzunezko Komunikazioan lizentziatu zen, masterra egin zuen Arte Garaikidean, Teknologikoan eta Performatiboan eta UPV/EHUn Artean eta Teknologian doktorea da. Lan esperientzia ikus-entzunezko ekoiztetxeetan: Pausoka, Eyeworks eta Warner Bros eta IEDn (Istituto Europeo di Design, Madril) irakaskuntzan. Gaur egun Arte Ederretako irakaslea da Artea eta Teknologia sailean. Artiatx arte garaikideko espazioaren sortzaileetako bat eta bertako kidea ere bada.

Proiektua “Zetaz Zeta” deitzen da aipatu dugun moduan, eta pintore naturalista/espresionista ospetsuaren omenez egindakoa da. Bere obrarik entzutetsuenak hesietan, hormetan eta zoruan proiektatzen dituzte, eta ikusleek artea modu berri batean hautematen dute (murgilduz, ikuslea agente aktiboa denaren ideiarekin, interakzioa eta abar). La Terminal deitzen da erakusketa dagoen lekua, eta bertako espazioarekin eta teknologiarekin mugitzen ari diren irudiak pantailetan eta zoruan erakusten dira eta toki guztia mugitzen ari den artelan ederra bihurtzen da. Sortzailearen arabera: "Erakusketa murgiltzaileak Zuloagaren mundu artistikoa eta barnekoa gogorarazten ditu eta itzalaren eta argiaren arteko elkarrizketa etengabea azpimarratzen du". Izan ere, ideia da museo klasikoetatik haratagoko zerbait ezberdina proposatzea, narratiba digital berriak bilatzea eta interakzioa eta parte hartzea esperientziaren ezinbesteko alderdia izatea nahi duen publiko berria erakartzea. Erakusketan Zuloagaren obraren zati handi bat dago ikusgai: bere hastapenak eta helduaroa, bere introspekzio geografikoa eta artistikoa eta bere sentsualitate beltza eta erretratuak. Erakargarria dena da ez direla bakarrik bere lanak proiektatzen, baizik eta baita horiei buruzko iritziak eta gaur egun zein museoetan dauden ere.

>> Proiektuen atalera itzuli